2024-cü ilin noyabrında Azərbaycan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi etdi. Bu barədə qərar COP28-in 11 dekabr, 2023-cü ildə keçirilmiş plenar sessiyasında qəbul edilib. 2024-cü ilin 11-22 noyabr tarixlərində dövlət və hökumət başçıları, vətəndaş cəmiyyəti təşkilatları, bizneslər və beynəlxalq institutlar Cənubi Qafqazda bir araya gələrək iqlim dəyişikliyi, Paris Razılaşmasının şərtlərinin yerinə yetirilməsinin sürətləndirilməsi ilə bağlı müzakirələr apardılar, həmçinin uzunmüddətli iqlim strategiyaları və hədəflərinə diqqət yetirdilər.

Beynəlxalq Münasibətlərin Təhlili Mərkəzi apardığı araşdırmaları ilə iqlim çağırışlarına qarşı həll yollarının hazırlanması, mövcud bazanın gücləndirilməsi və qərarvermə proseslərinin təkmilləşdirilməsi işlərinə öz töhfələrini vermişdir. Mərkəz tərəfindən Azərbaycanın enerji və yaşıl keçid siyasəti, COP29 hazırlıqları, habelə ölkəmizin COP29-la bağlı strategiyaları, öhdəlikləri və qlobal sammitin verdiyi imkanlar mövzularında çoxsaylı məqalələr, təhlillər və 2 kitab (“COP29 və Azərbaycanın töhfələri: Hökumət iqlim gündəmini necə dəstəkləyə bilər”; “Azərbaycanın COP29 Sədrliyinin icmalı: Prioritetlər və problemlər) dərc edilmişdir.

Eyni zamanda, yerli və beynəlxalq tərəfdaşlarla tədbirlər, seminarlar təşkil edilmişdir.

Bu tədbirlər arasında ADA Universiteti ilə birgə təşkil edilmiş “COP29 və Azərbaycan üçün Yaşıl Baxış” forumu 30 ölkədən 64 ekspert bir araya gətirmiş, regionun davamlı inkişafı və Azərbaycanın yaşıl enerji siyasəti ilə bağlı məhsuldar müzakirələr təşkil edilmişdir.

1 sentyabr 2024-cü il tarixində BMTM və GLOBSEC2024-ün birgə təşkilatçılığı ilə "COP29 və yaşıl üfüqlər: İqlim dəyişikliyinin idarə edilməsi" mövzusunda panel keçirilib.

8 oktyabr 2024-cü il tarixində BMTM və Böyük Britaniyanın Kral Birləşmiş Müdafiə Araşdırmaları İnstitutunun (RUSI) birgə təşkilatçılığı və Azərbaycan Respublikasının Böyük Britaniya və Şimali İrlandiya Birləşmiş Krallığındakı səfirliyinin dəstəyi ilə “COP29: İqlim dəyişikliyi, sülh və təhlükəsizlik” mövzusunda dəyirmi masa keçirilib.

15 noyabr 2024-cü il tarixində BMTM və Braziliyanın Beynəlxalq Münasibətlər Mərkəzi tərəfindən COP29 çərçivəsində sessiya təşkil edilib. Azərbaycan və Braziliyanın davamlı enerji keçidinə nail olmaq istiqamətində müəyyənləşdirdikləri yol xəritələri, strategiyalar, eləcə də enerji keçidində neft-qaz sektorunun rolu, bu zaman zəruri olan maliyyə resursları sessiyada əsas müzakirə mövzuları oldu.

Həmçinin, 15 noyabr 2024-cü il tarixində Beynəlxalq Münasibətlərin Təhlili Mərkəzi və COP29 Sədrliyinin birgə təşkilatçılığı ilə "COP29 Düşüncədən əmələ: Bakı Habı ilə həll yollarının formalaşdırılması" mövzusundakı dəyirmi masada beyin mərkəzlərinin işçi qrupu yaradılıb.