Beynəlxalq Münasibətlərin Təhlili Mərkəzinin şöbə müdiri Vasif Hüseynovun ABŞ-ın “The National Interest” nəşrində “Rusiyanın regional hegemonluğunun zəiflədiyi Cənubi Qafqazı təlatümlü dövr gözləyir” başlıqlı məqaləsi dərc olunub. Müəllif yazır ki, dünyanın diqqəti ilk növbədə Rusiya-Ukrayna məsələsinə yönəldiyi bir vaxtda regionda digər narahatedici hadisələr baş verir. Onun sözlərinə görə, İran hərbi qüvvələrini Azərbaycanla sərhəddə cəmləşdirir və Naxçıvan yaxınlığında hərbi təlimlər keçirməyə hazırlaşır. Bununla yanaşı martın 11-də İrana məxsus hərbi təyyarənin Azərbaycan-İran dövlət sərhədi boyunca fasiləsiz uçuş həyata keçirməsi barədə məlumat verilir. Müəllifin fikrincə, bu təxribatçı hadisələr regional status-kvondan nəzərəçarpacaq dərəcədə uzaqlaşma deməkdir. Vasif Hüseynov son aylar İran-Azərbaycan münasibətlərinin gərginləşməsi istiqamətində baş vermiş hadisələri sadalayır və bu hadisələrin iki ölkə arasında gərginliyi əhəmiyyətli dərəcədə artırdığını və şiddətli qarşıdurmanın baş verə biləcəyi ilə bağlı narahatlıqların yarandığını qeyd edir.
