BMTM-in şöbə müdiri Vasif Hüseynovun Azərbaycan “Xocalı soyqırımı anır” başlıqlı məqaləsi Gürcüstanın “Georgian News Agency”, İsveçin “Diplomatic World Sweden” və Latviyanın “Latvijas Avīze” nəşrlərində dərc olunub.
Müəllif bildirir ki, Azərbaycanın Qarabağ bölgəsinin işğalı və etnik təmizləməyə məruz qalması dəhşətli zorakılıq halları ilə müşayiət olunub. Ermənistan ordusu tərəfindən 1990-cı illərin əvvəllərində aparılmış etnik təmizləmə çoxsaylı humanitar faciələrə səbəb olub. Lakin onlar arasında ən dəhşətlisi 600-dən çox azərbaycanlının qətli ilə baş verən 1992-ci ilin Xocalı soyqırımı oldu.
“2008-2018-ci illərdə Ermənistan Prezidenti olmuş Serj Sarkisyan etiraf etmişdi ki, Xocalıda kütləvi qətliam törətməkdə əsas məqsədləri digər azərbaycanlıları qorxutmaq və regionu tərk etməyə məcbur etmək idi. 1992-ci ildə Qarabağdakı separatçı rejimin komandiri olan Sarkisyan Britaniya jurnalisti Tomas de Vaala 2000-ci ilin dekabrındakı müsahibəsində bildirmişdi: “Xocalıdan əvvəl Azərbaycanlılar düşünürdülər ki, biz onlarla zarafat edirik. Onlar düşünürdülər ki, ermənilər mülki əhaliyə əl qaldıra bilməz. Biz bütün bunlara son qoymalı idik. Və bunlar baş verdi” ”.
V. Hüseynov qeyd edir ki, Azərbaycanın Qarabağ regionunun strateji əhəmiyyətli hissəsi olan və yeganə aeroportun yerləşdiyi Xocalının işğalı Ermənistanın ətraf rayonları ələ keçirmək planlarında vacib yer tuturdu.
“Azərbaycanın 2023-cü ilin sentyabrında həyata keçirdiyi antiterror tədbirləri Qarabağ regionundakı separatçı rejimə son qoydu və bu torpaqlara azadlığı bəxş etdi”, deyə müəllif xatırladır.
Sonda qeyd olunur ki, torpaqlarımızın işğaldan azad edilməsi ilə Ermənistan və Azərbaycan arasında sülhə heç olmadığı qədər yaxındır. Ermənistanın törətdiyi cinayətlərə görə məsuliyyətdən yayındığını diqqətə çatdıran V.Hüseynov onun regional sülh və təhlükəsizliyə təhdid yaratdığını vurğulayıb. “Ermənistanın öz üzərinə məsuliyyəti götürərək müharibə cinayətlərinə düzəlişlər etməsinin zamanı gəlib. O zaman iki ölkə gələcəkdə sülhə nail ola bilər”.
https://eng.ghn.ge/news/16602-azerbaijan-commemorates-the-khojaly-genocide
