BEYNƏLXALQ MÜNASİBƏTLƏRİN TƏHLİLİ MƏRKƏZİ

Axtar

“Ermənistan Azərbaycan torpağını işğal etməsi barədə nələri deməyəcək?”- The National İnterest

2020-10-03 12:00

Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyevin “National Interest” nəşrində Ermənistan-Azərbaycan münaqişəsi çərçivəsində son günlər baş verən hadisələrə dair “Ermənistan Azərbaycan torpağını işğal etməsi barədə nələri deməyəcək?” adlı məqaləsi dərc olunub.

Məqalədə bildirilir ki, danışıqlar prosesinin dalana dirənməsi və hərbi vəziyyətin gərginləşməsi ilə Azərbaycanın BMT Nizamnaməsinin 51-ci maddəsinə müvafiq olaraq özünümüdafiə məqsədilə güc tətbiqinə əl atmaqdan başqa çarəsi qalmayıb. Qeyd edilir ki, sentyabrın 27-də Azərbaycan 1992-94-cü illərdə itirdiyi işğal olunmuş əraziləri azad etmək üçün Ermənistan Silahlı Qüvvələrinə qarşı əks-hücum kampaniyasına başlayıb.

Məqalədə qeyd edilir ki, hərbi əməliyyatlar döyüş meydanında davam etdikcə təbliğat müharibəsi də güclənib: “Münaqişədən bəhs edən Qərb ölkələrindən olan bir qrup tədqiqatçı, ekspert və jurnalistlər münaqişənin yalnız geosiyasi və tarixi aspektlərinə diqqəti yönəldib, ancaq ermənipərəst hekayələrə sığmadığı üçün ən vacib ünsürə, yəni beynəlxalq hüquq tərəfinə səssiz qalıblar”.

Müəllif həmçinin yazır ki, bölgədə baş verən son hərbi hadisələr bəzi Qərb mediasında ermənipərəst şəxslərin köməyi ilə bir neçə geniş yayılmış stereotiplərlə təsvir olunur. Belə ki, N.Paşinyan hökuməti qarşıdurmanı dini qarşıdurma olaraq qələmə verməklə yanaşı, demokratiya avtokratiyaya qarşı uydurmaları ilə təqdim etməyə çalışır: Həmçinin bəzi Qərb mediasında erməni ultramillətçilərinin lobbiçilik səyləri ilə Azərbaycana qarşı qurulmuş stereotiplərə meyl göstərilir: “BBC və Reuters kimi agentliklər davam edən döyüş əməliyyatları barədə bəzi yazılarda Azərbaycanda guya suriyalı döyüşçülərin olması lə bağlı təsdiqlənməmiş mənbələrə əsaslanaraq saxta xəbərlər yayırlar”.

Müəllif həmçinin qeyd edir ki, əslində, Azərbaycan müsəlman radikallarını qanunun bütün səviyyəsində mühakimə edən, İŞİD döyüşçülərini həbs edən, ABŞ-ın Əfqanıstan və İraqdakı əməliyyatlarını dəstəkləyən və Qərb kəşfiyyat orqanlarına terrorizmə qarşı mübarizədə dəstək göstərən güclü dünyəvi ənənələrə sahib bir ölkədir: “Vaşinqtondakı erməni lobbi qrupları, məsələn Amerikanın Erməni Milli Komitəsi və Kapitol Təpəsindəki adamları, o cümlədən bir neçə konqresmen və senator bir etnik qrupun dar ksenofobiya və ekstremist iddialarını irəli sürərək ABŞ-ın milli maraqlarına böyük ziyan vurur”.

Daha ətraflı: https://nationalinterest.org/blog/buzz/what-armenia-wont-tell-you-about-its-occupation-azerbaijani-land-170038