14-15 oktyabr tarixlərində Özbəkistan Respublikasının Daşkənd şəhərində Türk Dövlətləri Təşkilatına (TDT) üzv və müşahidəçi dövlətlərin xarici siyasət araşdırmaları üzrə rəsmi beyin mərkəzlərinin 8-ci forumu keçirilib. Panel müzakirələri TDT məkanında ticarət-iqtisadi əməkdaşlığın inkişafına və nəqliyyat-loqistika qarşılıqlı əlaqəsinə həsr olunub.

Forum çərçivəsində həmçinin TDT ölkələrinin analitik mərkəzləri arasında Anlaşma Memorandumunun imzalanıb. Sənəd təşkilat daxilində gələcək inteqrasiya prosesini asanlaşdırmaq məqsədilə iştirakçılar arasında müntəzəm təmasların davam etdirilməsi və hərtərəfli əməkdaşlığın inkişafı üçün şərait yaratmaq məqsədi daşıyır.

Özbəkistan Respublikasının Prezidenti yanında Strateji və Regionlararası Araşdırmalar İnstitutu tərəfindən təşkil olunan forumda Azərbaycan, Qazaxıstan, Qırğızıstan, Özbəkistan, Türkiyə, Macarıstanın aparıcı beyin mərkəzlərinin 60-dan çox tanınmış eksperti, o cümlədən TDT Katibliyinin nümayəndə heyəti iştirak edib.

Azərbaycanı adıkeçən tədbirdə Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev, Mərkəzin şöbə müdiri Cavid Vəliyev və aparıcı məsləhətçisi Nağı Əhmədovdan ibarət nümayəndə heyəti təmsil edib.