Beynəlxalq Münasibətlərin Təhlili Mərkəzinin (BMTM) fəaliyyət istiqamətlərindən biri kimi vaxtilə Ermənistan və Azərbaycan arasında mövcud olmuş münaqişənin tarixi kökləri və həlli yolları araşdırılmışdır.

Lakin Azərbaycanın İkinci Qarabağ müharibəsində şanlı qələbəsi və bölgədə yeni postmünaqişə mühitinin formalaşması bu fəaliyyət istiqamətinin bir qədər yenilənməsinə səbəb olmuşdur. Beləliklə, 2020-ci ilin sonundan başlayaraq BMTM postmünaqişə kontekstində Ermənistan-Azərbaycan münasibətlərinin müasir dövrü və perspektivləri istiqamətində tədqiqatlar aparır.

İlk olaraq, Ermənistan və Azərbaycan arasında münasibətlərin normallaşdırılması və sülh müqaviləsinin əldə edilməsi istiqamətində mövcud çağırışlar və imkanlar araşdırılır. Eyni zamanda, hər iki cəmiyyət arasında inamın yaradılması məsələləri təhlil edilir, Azərbaycanın sülh gündəliyi çərçivəsində birgə yaşayış, reinteqrasiya və eləcə də, vaxtilə Ermənistandan qovulmuş azərbaycanlıların geri qayıdışı ilə bağlı müvafiq arayış və hesabatlar hazırlanır, məqalələr nəşr edilir.   

Mərkəzin əməkdaşları tərəfindən postmünaqişə dövrünə xas olan bir sıra digər məsələlər, o cümlədən Qarabağ və Şərqi Zəngəzur iqtisadi rayonlarında aparılan geniş miqyaslı bərpa və yenidənqurma işləri, mina probleminin yaratdığı fəsadlar, Birinci və İkinci Qarabağ müharibələri zamanı itkin düşmüş şəxslərin taleyi, kütləvi məzarlıqlar problemi, urbisid, kultursid, ekosid halları və s. mövzular ətrafında vaxtaşırı araşdırmalar aparılır.     

Eyni zamanda, keçid ədaləti konsepsiyası çərçivəsində müvafiq tədqiqatların, reparasiya ilə bağlı  xüsusi araşdırmaların aparılması nəzərdə tutulur.